陳雷台語文學讀冊會[短篇小說集第21回22回] 2022/10/09，2022/10/16《集1阿春無罪》p.67～69 Thâi狗
🖋💻記錄報導作者：Huī-lêng
.
📖故事簡介
Ta̍k-ke佇路裡喝「自治！自治！」，警察驚遊行攏m̄敢出來。...寒流來--ah，風聲講「國軍」欲來八堵。囡仔人料想國軍是欲來掠狗去刣......
👨🏫陳雷sian 來開破
1️⃣🙋🏻 為啥物選七堵八堵這个所在做故事ê地點？«紅牡丹»和«Thâi狗» ê背景攏是佇七堵八堵，有啥物特別ê原因？
👨🏫 «紅牡丹»比«Thâi狗» òaⁿ 兩冬siá -- ê。這兩篇會使看做姊妹仔來讀。故事地點攏選七堵八堵，是仝款ê理由。228 ê兩禮拜後，兵仔對基隆港向南一路刣落-來，佇八堵臺灣人有抵抗，國軍刁工佇hia刣人特別厲害，刁工欲教示臺灣人。選七堵八堵欲予人想起這層代誌。恁若欲知影發生啥代誌，會使去查228以後中國兵來ê經過。
📖資料：
二二八事件紀念基金會 https://228.org.tw/eseki-view.php?ID=38
吳三連基金會有出版口述歷史ê冊。《基隆雨港二二八》(基隆地區），張炎憲、胡慧玲、高淑媛 http://www.twcenter.org.tw/publications/a02_2_a_f/a02_02_228_01/a02_02_228_02
.
.
2️⃣🙋🏻 抵抗ê所在誠濟？敢毋是佇高雄死上濟人？
👨🏫 袂使用人數來看。因為七堵八堵是小所在，人口無濟，總刣mā袂比高雄較濟。
.
.
3️⃣🙋🏻. 為啥物用囡仔和狗來寫這个故事？
👨🏫 這篇用囡仔ê眼光來寫228事件中國兵屠殺ê經過，毋是用大人ê角度。就文學來看，用囡仔人ê角度來講出大人ê問題，這種寫法真好。因為囡仔人真濟代誌kài-sêng知，kài-sêng毋知，會使表現用大人眼光袂當表現ê物件。E.g. 為啥物兵仔來，我就袂當出去？為啥物「害--ah，連房間也戒嚴」？（69-02-07）實際上，這攏是大人ê問題。若用囡仔ê角色來寫，因為囡仔人有ê代誌知，有ê代誌毋知，所以變做用囡仔ê目睭來說明大人ê想法。
.
.
4️⃣🙋🏻 62-01-05，70-03-03 「M̄-kù，和平，永遠，清天……𪜶無飼狗」，Sian--ê用「和平，永遠，清天」做人名，是毋是teh暗示：gún這个所在本底是和平，永遠，清天？
👨🏫 無毋著。「和平」、「永遠」、「清天」（Chheⁿ-thiⁿ）是規个小說內面足重要ê三个名。開頭就寫這三个詞出來，表示這tah本來是永遠有希望，平安ê所在。共號做人ê名，來暗示背景，這是足間接ê寫法。我希望讀者會受著暗示。
.
.
5️⃣🙋🏻 為啥物出現美人「秋月」這个電頭chang，āiⁿ囡仔，猶未度晬ê婦人人？敢是講真普通ê婦人人mā會死？
👨🏫 無毋著。這攏是台仔頂設布景。予讀者知影七堵八堵猶未出代誌以前，是生做啥款ê情形。簡單兩三逝予你一个印象。
.
.
6️⃣🙋🏻 「昨暗寒流來」（66-02-06），「另外koh再一个寒流來，雄雄天變烏陰，koh冷凍」（68-04-01）。Sian--ê用「寒流」暗示戒嚴？
👨🏫 是。普通會使寫ta̍k-ke真緊張--ah，phi̍h-phi̍h掣等等。Chia用「寒流」暗示氣氛，表示環境真艱苦，真嚴重。這是一个寫法。
.
.
7️⃣🙋🏻 Sian--ê敢有toà過, 抑是去過七堵八堵？
👨🏫 毋捌。背景ê描寫攏是聽人講--ê。
.
.
8️⃣🙋🏻 真濟台灣人kan-ta知影228三字，毋過對228事件無了解，嘛無想欲了解。
👨🏫 228事件是台灣歷史oat角ê所在，足重要。228事件了後，臺灣人ê認同才發生。佇這進前，台灣人無「台灣」ê認同，台灣人認為家己是日本人，抑是認為家己中國人，認為家己是台灣人真少數。因為228屠殺，台灣人開始想家己毋是日本人，mā毋是中國人，「Who am I ?」這ê問題才走--出-來。我講過，佇我這款背景ê作者有一个責任，就是愛kā代誌寫--出-來。我寫真濟228事件和白色恐怖ê小說，原因之一就是欲記錄歷史。
.
.
9️⃣🙋🏻 Sian--ê敢有用英文寫病人ê故事？
👨🏫 無。我真罕得用英語寫故事。因為我對英文無像台語hiah-nī-á有把握。若是台語，我知影「tìm」「tàm」差佇tó-ūi，當時愛選這字，當時選彼字。若是英文，我無法度。若用英文寫作，我知影我一定袂滿意。
.
.
🔟🙋🏻 Sian--ê «台灣ê大禮»彼篇講南島民族遷徙。Sian--ê對無仝領域ê代誌mā去研究？
👨🏫 彼篇佇「寫予學生朋友ê代誌」(散文)系列，已經有50外篇，攏短短--a，刊佇«罔報» 和«信望愛»。對無仝ê代誌，攏ka斟酌，歷史--lah，故事--lah，天文，地理種種。有一站仔我對物理mā足趣味。咱對逐項攏放較開--leh，我叫做咱人ê視界。我有寫一篇«咱人ê視界»，是我人生上基本ê 哲學。我相信你看了會同意我講ê真濟代誌，你做人ê觀點小可會改變，會較快樂，較袂失落--去（get lost）。
«咱人ê視界»：https://www.peoplemedia.tw/news/848815b0-37d1-447d-b654-ca628aa48511
«台灣ê大禮»：https://chbp.tgb.org.tw/2022/03/e_28.html
.
.
👨🏫 «Thâi狗» mā有補寫改做中篇，刊佇台文戰線。（Thâi狗（中篇小說）2019年台文戰線2019 3 kap 2019 7刊）
.
.
🔖字詞
1️⃣📌68-01-01 ná像teh giâ 鬧熱。mā有講ngiâ鬧熱。
2️⃣📌68-01-05 貪官汙吏（tham-koaⁿ-ù-lī）
3️⃣📌68-04-05 「有gia̍h銃，講beh來足chē足chē。」比較：giâ（出大力）
4️⃣📌69-01-03 「欽--a𪜶大姑toà tī七堵出--去真草地 hia」。形容詞ê用法。
👨🏫 草地：交通不便，毋是都市ê所在。中國話ê「鄉下」(2022.12.11 第30回補充)
5️⃣📌69-01-10 「𪜶概sêng知影有危險」危：guî/huî。莫受中國話影響讀做uî。
Q. 佇字典查「危」，ná會查無 「huî」ê音--leh？
A. 愛查「詞」，莫查孤「字」，因為「字」按怎讀是「詞」來決定。
6️⃣📌69-02-05 「門mā chhòaⁿ ân-ân，用桌á跤tú leh」。應該有輕聲符tú--leh。
～～～～～～
💁想beh讀所有ê記錄報導？
➊網路google～ 瑞士台語社Blogger
or ➋去 瑞士台語社FB迷眾頁看 "相簿" Ùi “Blogger” 讀&查 #陳雷台語文學讀冊會 ê記錄報導： https://reurl.cc/1GaprV
Ùi “FB相簿” 讀&查 #陳雷台語文學讀冊會 ê記錄報導：https://reurl.cc/jvjOXn
留言
張貼留言