陳雷台語文學讀冊會56回《鄉史補記》chiâⁿ做台灣人ê神話

3月 22, 2022

陳雷台語文學讀冊會56回《鄉史補記》chiâⁿ做台灣人ê神話

#陳雷台語文學讀冊會56回 #2022.3.06 #鄉史補記(全)

🖋💻本篇作者：文A-Chhiu、圖A-Koan

一、讀soah ê感想kap討論

♥️陳雷老師ê感想：

按歷史角度來看這本冊，歷史影響咱ê人生觀⋯等觀念。台灣200 gōa年來，tùi 林爽文事件到taⁿ，kā這段歷史真誠實，用文學ê方式，真起工ka寫--出來，「鄉史補記」是hō͘人了解歷史ê一種方式。

Beh問大家對教科書kap歷史小說ê精差？Iā tō是in乎咱了解真正ê歷史ê方法kap效果差tī兜位？

［歷史類ê教科書］

🔹用第三人稱來寫（A明）

🔹讀者kán-ná是第三者ê角度

🔹Khah Ta-sò (Hê-bí)

🔹無趣味性（A明）

［文學小說］

🔸Ē用第一、第二kap第三人稱來寫

🔸讀者kán-ná是tī故事內底ê人，kap in tih生活

🔸Khah siâⁿ--人，有感情tī內底，是寫咱身軀邊ê人ê生活。 (A-Koan)

🔸像tih/teh看電影。(A-Chhiu)

🔸Ē引起咱ê好奇心 (Hê-bí)

🔀⚡️陳雷老師補充：

Tio̍h！文學加khah趣味。

影響咱ê思考kap價值觀文學ē。

文學ê藝術性kap地位：是族群ê集體記持，chhiūⁿ英國族群ê形象kap記持，袂使kap莎士比亞ê文學作品分開。莎士比亞ê文學作品，已經chiâⁿ做是英國人ê集體記持ê一部分，文學ē當達到hit種地位。

♥️Ui-liông：我感覺這本小說真無仝，伊用原住民ê角度來寫咱台灣ê歷史，這點我毋pat看--過，嘛是感受khah大--ê，以前咱受ê教育講咱是所謂ê “漢人”，原住民kap咱鬥陣生活tī台灣這tè土地，但是，in kap我有siáⁿ-mı̍h關係？Kán-ná斷去--leh!看這本chu寫原住民in ê生活、過去kap láu-á ê關係是按chóaⁿ？In hit-tang-chūn ê生活是按chóaⁿ？這是我khah感動--ê。

🔀⚡️陳雷老師補充：

Ùi 東史補記ê話頭，特別有講tio̍h，tùi這本冊hō͘讀者想倒轉去，台灣人ê來源是多元，m̄是中國國民黨kā咱教--ê hia單一。

♥️Hê-bí：

教科書khah ta-sò。文學ê藝術性、娛樂性，hō͘咱有想像ê空間。

我愛看電影、戲劇kap拍電動，這馬ê電動做kah真幼路、真有藝術性，ǹg望有人kā鄉史補記設計做電動hō͘人來sńg。

🔀⚡️陳雷老師補充：

文學kā歷史chiâⁿ做有血、有肉、有人味ê滋味出來。

♥️A明：

歷史小說有趣味性，m̄-koh三分真七分假，愛去查證

🔁Lī-chhin回應：

是真iah是假？Tō愛看主導者，像以早中國國民黨政府ē叫外國人來寫chı̍t-kóa文章、hip chı̍t-kóa相片，來做政治上ê宣傳。

🔁⚡️陳雷老師回應：

冊底ê人名是假--ê，故事表現ê概念是真ê，作者愛lia̍h hō͘ tiâu，chiah袂 chiâⁿ做像中國國民黨ê政治宣傳。

♥️Jūn-têng：

每一ê國家lóng有in ê神話，咱嘛需要咱ê神話。對伊有感情了後，tō想beh去了解，這本冊真適合提來送朋友。

🔁⚡️陳雷老師回應：

世界上每一ê族群lóng有in ê神話，chiâⁿ做in族群ê根。

🔁Jūn-têng回應：

一位牧師講咱愛用家己ê神話，來拍破中國殖民咱所講ê神話。

♥️Hê-bí：

這本冊kā我頭腦刺激

1、用台語書寫hō͘我了解台語是siáⁿ-mı̍h款？原來我ê台語kán-ná毋是台語。

2、用小說來補寫咱無清楚ê身分kap歷史。

🔁⚡️陳雷老師回應：

1、刺激咱想beh了解ê歷史是siáⁿ-mih款。

2、文學是語言siōng蓋精華、水準siōng koân ê表現。文學用tio̍h真幼路ê所在，kā台語潛在ê力量表達出來，藝術性khah深，咱以早無機會來表達--出來。

🧐⚡️陳雷老師提問➡️：

我參加這ê讀冊會加真少年，大家真自動，大家轉去思考一流ê人kap一流ê國家是siáⁿ-mih品質？

🏆大家讀了ê感想～

💕Sè-lâm：

Hiong-sú-pó͘-kì sī chi̍t pún chiâⁿ cheng-chhái ê tn̂g-phiⁿ Tâi-oân le̍k-sú sió-soat. Khan-siap--tio̍h ê tāi-chì, jîn-bu̍t hui-siông chē, sî-kan mā chiok tn̂g. Tân-lûi lāu-su lī-hāi ê só͘-chai tō sī i iōng chió-chió koh oa̍h-thiàu ê bûn-jī lâi kóng che lò-lò-tn̂g ê kó͘-su.

Kui-pún chheh ê khek-tiāu to lóng sī khiā tī leh Tâi-oân jîn-bîn ê li̍p-tiûⁿ teh thè jio̍k-sè-chiá kóng-ōe. Kā 19 sè-kí chho͘ kàu 20 sè-kí bóe tiōng-iàu ê sū-kiāⁿ to ū kau-tāi.

Siōng tiōng-iàu--ê sī kā Pêⁿ-po͘-cho̍k siau-sit--khì ê keng-kòe kóng hō͘ lán chai, lâi pó͘ chiáⁿ-sú ê put-chiok. Súi-khùi ê Tài-gî koh khah sī hō͘ lâng kám-tōng--ê, chē-chē bô thiaⁿ--tio̍h ê giân-gí koh tńg--lâi ah, che sī siōng tin-kùi ê pó-chōng.

💕Ui-liông：

Ē-sái iōng chū sòe-hàn tiō ē-hiáu ê ōe lâi thak lán ka-kī kò͘-hiong ê kò͘-sū, sī chiok hēng-hok koh sim-sek ê tāi-chì。

Chit pún chheh ho͘ góa khòaⁿ-- tio̍h mā khòaⁿ-ū tâi-gí ê súi kap khoah。nā-kóng ē-hiáu chi̍t-chiòng ōe, tiō chhin-chhiūⁿ phah-khui chi̍t-ê thang。Hiān-chāi góa ê sim-thang put-tān phah kah khui-khui--khui, mā khòaⁿ tio̍h m̄-bat kìⁿ kòe ê san chhoan kah hái-éng，sīm-chì thang-á-mn̂g gōa gín-ná ê chhiò siaⁿ kah hoe-chháu ê phang, góa mā lóng thiaⁿ ê tio̍h 、 phīⁿ ê tio̍h。kám-siā lāu-su pôe gún tàu-tīn thak，hō͘ gún ē-tàng khòaⁿ koh-khah hn̄g，phīⁿ koh-kha phang 。

💕Kùi-lân：

Chit pún chheh chiong chhàng tī lāi-sim siōng chhim siōng chhim ê *Chhián ì-sek* Tui o͘-àm ê chhim-ian giú--chhut lâi，kìⁿ tio̍h kng。

Ǹg-bōng chit pún chu í-hāu sī Tâi-oân lâng ê *Sîn-ōe*，ho͘ lán thong kiat chò hóe。

💕Siù-ki：

多謝你，我是真慢才加入鄉史補記的讀冊會，歹勢，我的拼音速度真慢。一本真厚的冊我讀較少，毋閣看了真驚奇，陳雷老師描寫人的穿插、動作真活潑真詳細；安排情節真kín-tsàu；而且作者寫作的觀點是徛佇台灣住民的立場，袂醜化原住民和台灣人，多謝有人推出這个讀冊會，予逐家有機會讀這本好的作品，閣揣作者親身解說，真正難得!

💕Hê-bí:

Kā Hiong-sú Pó͘-kì tha̍k soah liáu-āu, hoat-kiàn chit-pún siáu-soat ū hō͘ góa 2-ê chiok tōa ê chhì-kek.

Thâu 1-chân, hō͘ góa chai-bat góa ê Tâi-gí m̄ sī Tâi-gí, chha-put-to kō͘ Tiong-kok-ōe teh su-khó. Goân-lâi Tâi-gí ē-sái iōng chin seng-oa̍h-hòa, chū-jiân koh oa̍h-thiàu ê jī-sû kap gí-kù, lâi biô-siá tiān-iáⁿ-kip ê ōe-bīn, sú lâng kám-tōng. Chèng-bêng lán ê ōe m̄ sī bô hoat-tō͘ kóng, sī gún í-keng bē-hiáu kóng--ah. To̍h ài phah-piàⁿ ka khioh tò-tńg--lâi.

Lēng-gōa 1-chân, hō͘ góa khai-sí su-khó góa ka-tī sī siáⁿ-mih lâng, Tâi-oân-lâng kám tek-khak lóng ùi Tn̂g-soaⁿ lâi, a̍h-sī seng-oa̍h-tek bô-ta-ôa lâi kái-piàn ka-tī ê jīn-tông. Tùi-chiàu chit-má Tâi-oân-lâng í-keng hông sé-náu chò 1-tīn hoaⁿ-hí ê Tiong-kok-lâng, kám sī kāng 1-iūⁿ--leh? Che to̍h sī chit-pún chheh "pó͘-kì" ê ì-gī. Hō͘ lán chai-iáⁿ thang khì cháu-chhōe ka-tī ê lêng-hûn, ka-tī ê sin-hūn jīn-tông.

Kám-siā Tân-lûi sian-siⁿ, siá chit-pún hiah cheng-chhái koh ū ì-gī ê Tâi-bûn siáu-soat, lâu hō͘ lán Tâi-oân-lâng. Sī lán ê hok-khì, mā sī lán ê pó.

💕Î-him:

其實guá sī tiong-ng 才加入tsit-ê 讀冊會，tsi̍t-khai-sí guá就siūnn-kóng bô 冊 tio̍h bong聽，發現逐家lóng kái 認真leh 討論lāi-té ê 問題，有時陣bô 冊tio̍h m̄-tsai-iánn leh 討論siánn-mih，kuánn-kín 去bé冊，後來leh khuànn tsit-ê tsok-phín ê sî-tsūn，感覺tshin-tshiūnn sī阿媽抑是老爸老母leh kóng 故事hōo lí聽，真tshin-tshiat，lî-tshiánn 又閣sī 台灣ka-kī過去歷史 ê 故事，tha̍k--khí-lâi 心內感情變化，ē佮lāi-té 劇情發展，做伙起起lo̍k-lo̍k，陳雷老師biâu-siá ê 方式mā 真正iù-jī，毋管sī 人物 ê 心情，抑是動物 ê 行為、故事背景，lóng 摻tshiūnn tsit-ê 故事現此時tio̍h 佇lí 面頭前 leh puann 仝款，所以逐擺tha̍k，逐擺lóng kám-kak 足ū bī，lú-tha̍k tio̍h lú līn-bat ka-kī ê 土地，ka-kī ê 母親，到底發生過siánn-mih代誌，tsai-iánn 過去，才ē-tàng 了解lí ka-kī、完整lí ka-kī，kè-sio̍k iōng ka-kī 小小ê力量去huah 醒閣較tsē人，ūi咱心愛ê台灣做伙拍拚。

💕HUi-sin：

這是我第一本ê台文冊，chiah發覺原來台文ē-sái 寫kah hiah-nī--ah súi，我後來ē kap pē母討論阿公、阿媽in以早是按chóaⁿ講！

💕Bêng-chin：

以早我無tih看小說，是惠宇Hūi-ú足推薦。我pat借ㄧ本「台灣血統」kap看過林媽利ê研究報告，我感覺我應該是平埔族ê後代。

💕A-Koan：

我以早無tih讀文學，足好運，多謝Hê-bí紹介陳雷老師kap伊 ê作品hō͘我熟似。最近koh kap大家做文學Tân雷公Podcast，kán-ná是懷胎生出來ê囡 á，咱繼續chhiâⁿ養。老師kap咱作伙讀伊ê作品，咱實在足幸福！

💕A-Chhiu：

多謝老師寫這本冊，chiah知影原來台文小說hiah趣味、有深度，嘛khah了解咱台灣兩百gōa年來ê歷史，chia-ê代誌中國國民黨政府無興趣，嘛無愛咱知，長期以來咱對家己ê身份認同lóng chìn錯亂，看過這本冊了後，hō͘我看tio̍h平埔族hō͘政治強勢者同化，認賊做pē，有chı̍t-kóa毋甘。ǹg望有koh-khah-chē人來看這本冊，了解這段hŏng khàm去ê歷史。

二、😘Hūi-ú分享伊chhōa 囡á去「文學行踏」 ê 經驗，nā 有想beh詳細了解，請看chia👀

https://www.facebook.com/105895764128461/posts/726507762067255/?d=n

🎈《Hê-bí放送》打狗台語開講社最近已經tih規劃「鄉史補記」ê文學行踏，敬請期待💌

📣今á日無時間做鄉史補記lia̍h漏，後回chiah

搜尋此網誌

Làu台語-瑞士ê台語社

陳雷台語文學讀冊會56回《鄉史補記》chiâⁿ做台灣人ê神話

留言

張貼留言

熱門文章

記錄報導聲音版第2回

陳雷台語文學讀冊會 2022年3月下旬開始【陳雷短篇小說集】5本

陳雷台語文學讀冊會56回《鄉史補記》chiâⁿ做台灣人ê神話

留言

張貼留言

熱門文章

記錄報導聲音版 第2回

陳雷台語文學讀冊會 2022年3月下旬開始【陳雷短篇小說集】5本

記錄報導聲音版第2回